• 29 11 2024

    What’s App Yanskian 25 11 2024

    Chrismaēl ap kontwole konbyen zo nan yon plat men. Li transfere nan 6èm ane depi yon semèn. LI pa nan 5èm ane ankò. Prèv kanè lekòl ane pase li pwouve sa.

    What’s App Olès 21 11 2024

    Nap kontinye koupe diri-a. Chak jou ak 16 ouvriye. Poun avanse pi vit nap ogmante nonb lan demen dye vle.

  • 22 10 2024

    22 10 2024 dyalòg nan telefòn avèk Olès

    • Tout moun anfòm. Yonn nan moun k’ap travay yo te ale Pòtoprens pou l’al pran swen. Twa timoun yo ki te sou trètman maladi tifoyid yo, fin ratabli nèt, men yo gen pou yo ale  Ench nan dat 31 oktòb la pou yon vizit nan lopital.
    • Kèk manm nan fanmiy Olès yo te ale Ozetazini avèk espwa pou yo jwenn pi rapid yon viza sou administrasyon Biden nan.
    • An Ayiti sitiyasyon an vin pi grav. Gangstè yo, mete tèt yo ansanm, pou yo pran pi plis zòn nan vil la. Gen anpil katye ki vid.
    • Yo poko janm rezoud pwoblèm, 70 vilajwa inosan yo te touye nan Pon-Sonde a. Daprè sa moun yo di, menm mò yo poko janm antere. Yon gwoup gang te asasinen yo, paske yo pa t’ reziste ak lapolis, pandan yo t’ap arete kèk manm nan gwoup gang yo a.
    • Ane lekòl la ap fonksyone nòmalman tout kote ki pa genyen ensekirite. Se pa menm bagay la pou Pòtoprens. Nan nò peyi a, jiskaprezan lapolis gen kontwòl sitiyasyon an. Se sa ki pèmèt tout lekòl nan rejyon sa ap byen fonksyone.
    • Gouvènman an panse li jwenn soutyen lame Kenyan an ki pwomèt li ke l’ap debarase li de tout gwoup gang yo. kesyon n’ap poze, men se kilè sa ap fèt.
    • Aktivite agrikòl nou an ap byen deroule. Nou preske fini avèk dezyèm saklaj la. Nou gen pou nou rekòlte pistach yo pa twò lontan, n’ap byen pase avèk li. Diri a tou, l’ap byen devlope. Pa twò lontan nou gen pou nou rekòlte yon pati, apre pita n’ap pran rès la. Erezman nou te plante anpil diri, anviwon 5 ekta. Tout sa pral bay nou manje pandan anpil mwa. Pwa kongo ak pitimi yo menm nou gen pou nou rekòlte yo nan mwa desanm ak janvye. Sanble plant yo ane sa ap bay pi bon rezilta depi nou kòmanse aktivite agrikòl la.
    • Tout bèf yo nèt anfòm. Genyen anpil zèb. Jèn towo a poko rive nan laj pou l’ akouple, men depi li fin pare pou sa, l’ap tou antre nan sèk repwodiksyon an.
    • Pak kochon an poko fini. Transpò tòl pou yo fè tèt kay la bloke akoz pwoblèm ensekirite nan peyi a.
    • Pou peye frè lekòl  pou pi gran yo, Olès te oblije prete kòb nan men pitit li William. Paske nan moman an la li danje anpil pou yon moun pase twò souvan nan labank.
    • Lajan pou travay renovasyon an rive, men mwen poko ale chèche l’ akoz pwoblèm ensekirite a.
    • Yonn nan jèn timoun yo ki te nan òfelina a (Wilner) te pwopoze pou li vin pentire. Li vle montre konesans li genyen. Depi nou jwenn bidjè ki nesesè pou sa, nou kapab kòmanse nan Sen Jozèf.
    • Sou enfliyans fanmiy li, Calèb te deplase pou ale Gonayiv pou fini etid li. Li lakay matant li. Li leve granm maten tou dousman li pati san li pa menm di orevwa. Li pa te jwenn dènye fèt depa li, epi tou li poko jwenn lajan depa li. Frè sa ki te motive l’ pou li ale a, ap viv Ozetazini, li te peye depi an avans tout depans li yo. Erezman li te montre li rekonesan.
    • Olès te revoke edikatris la paske li pa t’ap fè gwo bagay. Pou kounye a nou genyen sèlman Yanskian ak Junior kòm edikatè.  
    • IBESR, sèvis piblik ki responsab kontwòl òfelina yo, reparèt ankò. Kounye a yo egzije nou peye yon edikatè ke yo nome. Men pou sèlman pou administrasyon ke leta ap enpoze. Nou dwe peye li 40.000 goud chak mwa (280 ewo).
    • Lekòl la egzije pou Emmanuel ak deluxon genyen yon telefòn entelijan. Sa pral koute pa plis ke 500 dola us pyès.
    • Konpòtman Djeff pa bon menm menm. Li toujou konpòte li yon fason ki dròl. Gen kèk fwa li pa la nan manje maten, li menm azade l’ deplase nan lanuit. Olès te mande ak yon frè li ki pi gran pou pale ak li, men nan moman yo la li pasab.

    Nan dènye semèn mwa oktòb la, nou te voye bay tout marenn ak parenn yo, yon nouvo foto fiyèl yo ak yon ti mo remèsiman Olès. Ide sa soti nan Olès. Nan dènye semèn mwa septanm nan, parenn ak marenn sa yo te deja resevwa yon desen oubyen yon lèt ke fiyèl yo te fè pou yo. reyaksyon yo te bon jan pozitif.

  • 17 09 2024

    17 09 2024 dyalòg nan telefòn avèk Olès epi Yanskian

    • Tout moun anfòm. Wilkervince dwe ale nan randevou kay doktè 31 Oktòb sa la, nan lopital Ench. Li poko fin retabli nèt. Muradieu te resevwa mèkredi pase tout rezilta egzamen medikal li yo. Yo pa jwenn anyen ki grav. Men li gen pou li retounen nan yon randevou pou yon lòt kontròl mèkredi k’ap vini la. Lestomak fèmal la sou kontròl. Tout mesye yo ki te genyen l lan poko fin geri nèt
    • De nouvo timoun yo fenk rive la, yo te tris nan premye jou yo, yo te rive a. men pandan tan ap pase yo kòmanse vin byen adapte yo, epi yo jwe ak lòt timoun yo. De lòt timoun ankò gen pou yo vini aprè midi a, se yon Pè k’ap vini avèk yo.
    • Sitiyasyon peyi a pa janm chanje. Magre èd etranje yo, deplasman pou majorite rout nan peyi a, toujou bloke. Kidnapin nan toujou ap ogmante. Olès tande ke etranje yo kòmanse ap plenyen paske yo poko touche. Men nou pa wè kisa yo fè.
    • Rout pou ale nan vilaj vwazen nou ki se Sen Rafayèl ap separe piti piti, men nan bouk Sen Michèl gen kèk manm nan bandi yo ki kache pou yo fè move kou. Pou kounye a genyen yon jèn ki gen 16 zan yo kenbe pou yo mande lajan.
    • Konsèy prezidansyèl la ap jere ak 3 moun. Men tout fason yo pral fòse yo pou yo bay demisyon yo paske yo pa fè anyen pou yo mete sou pye yon konsèy elektoral, ki daprè konstitisyon an ki se premye etap la.
    • Ane lekòl la dwe kòmanse nan mwa oktòb. Men nan Pòtoprens anpil moun pa pran chans voye pitit yo lekòl. Men nan pwovens yo lekòl ap kòmanse’
    • Pifò nan timoun yo ki kite òfelina tout kite Sen michèl tou. Jeandelet ak Osnel yo Sen Michèl toujou. Josue Sam ak Ronald yo menm yo Sen Domeng. Wold Shadai ak wilken yo menm yo Okap. Epi lòt yo tankou Ronaldo ak Ricardo yo Gonayiv. Robenson li menm li Pòtoprens. L’ap viv nan bon kondisyon, paske li lakay yonn nan pitit Olès yo pandan l’ap tann yon travay. Tanzantan yo tout konn vin di nou bonjou.
    • Rekòt pistach la nòmal : pa gen pèd, men pa gen benefis tou. Kounye a n’ap tann rekòt pitimi ak diri. Yo kòmanse ap byen parèt, menm jan pou rekòt bannann nan. N’ap gen yon pi bon rega apre nou fini dezyèm saklaj la.
    • Dezyèm saklaj la sou sranbay toujou paske genyen anpil lapli. Men pou diri a ak bannann nan lapli a se yon gwo avantaj’
    • Nou touye yonn nan bèf yo an ijans. Yonn nan chen yo pandan lanuit te fè li pè, konsa li te tonbe mal. Kounye a nou gen vyann pou kèk jou.
    • Masònri nouvo pak kochon an fini. Nou gen pou nou kouvri li nan semèn k’ap vini la. Konsa l’ap prè.
    • Nan gran sal Sen Franswa a, genyen yon gwo fann, li koule. Nan moman pa gen lapli, n’ap rele Bòs Jean pou li wè kòman li ka repare sa pou evite gwo dega. Genyen pwoblèm imidite tou nan yon lòt chanm. Pou travay sa ka fèt fòk nou ta kanmenm deplase pano solèy yo.
    • Yanskian fè konnen ke genyen timoun dezòd nan vwazinaj yo ki pete de nan pano solèy yo, pandan y ‘ap tire wòch dèyè ti zwazo ak pistibal yo.
    • Petèt ke se menm timoun  dezòd sa yo ki kraze vit fenèt yo nan Sent-Àn nan.

  • 31 07 2024

    1. 31 2024 dyalòg nan telefòn avèk Olès epi Yanskian
    • Tout timoun yo nan vakans nou ka di pifò nan yo byen.
    • Okidjims ak Jean Ebel ap pran swen nan moman yo la nan yon sant sante. Yo pa pimal epi yo kòmanse ap pi byen manje. Yè Wilkervince te jwenn otorizasyon doktè lopital Ench lan pou li antre lakay, se te la li t’ap pran swen depi kèk tan, men li dwe kontinye suiv rejim yo.
    • Muradieu te gen pwoblèm lestomak fè mal depi plis pase yon semèn. Yo te fè tout analiz ki enpòtan yo pou li, li dwe retounen pran rezilta yo 30 dawout.
    • Tansyon Manmi Olès la amelyore, Papi Olès ap retounen fè yon kontwol nan mwa septanm. Yanskian anfòm.
    • Pa gen anyen ki pozitif ki pase nan peyi a depi apre dènye dyalòg nou an. Depi lè fòs etranje sa fin rive nan peyi, sitiyasyon an vin pi mal chak jou. Sa pa gen twòp anpil tan depi premye minis lan te eseye mete lòd nan yon lopital. Men bandi yo te anpeche fòs etranje yo antre nan espas la. Yo kontinye ap pale sou yon lòt gwoup militè anplis k’ap genyen anviwon 400 moun, men sa pa fè bandi yo ni cho fo ni frèt. Majorite moun nan pèp la te panse ke Guy Philippe, kòm li menm se te yon rebèl, yon bandi epi tou yon senatè, te kapab moun ki pi byen plase pou mete lòd. Gen lòt moun ki te panse pou yo refè tounen Aristide. Kidonk sitiyasyon parèt dezespere. Pifò nan wout yo bloke. Sèl grenn wout ki pase Sen Michèl ki relye Nò a ak Sid la fin kraze nèt.
    • Kondisyon klima a kòmanse amelyore nan sa ki konsène plant yo. Se vre ke pwa kongo yo ak pistach yo te mouri nan tè akoz twòp dlo, men nou te gentan replante yo.
    • Nou te jwenn anpil difikilte pou nou jwenn anpil kòb labank. Petèt ke se akoz batay lajan kont nwa yo. Olès te ale Ench, ki se kapital yonn nan pwovens vwazen nou yo, pou li kapab ranpli tout fòmalite ki enpòtan yo.
    • Yanskian te resevwa bidjè li te bezwen pou li achte mèb li yo.
    • Travay jaden yo koute pi chè ke sa nou te panse. Pou kounye a yon travayè resevwa 1.000 goud pou yon jounen (7 ewo).
    • Premye saklaj la fini. Ap genyen yon dezyèm saklaj avan nou rekòlte. Bèf yo anfòm kounya paske gen anpil lapli ki fè zèb yo pouse anpil anpil. Gen yonn nan bèf yo ki fè pitit. Nou t’ap byen pran swen li pandan plizyè semèn. Pou kouye a nou gen nou 8 ti mal ak femèl bèf.
    • Tout timoun yo fin enskri pou ane lekòl la 2024-2025, sèlman Deluxon ak Emmanuel ki dwe jwenn yon plas. Tout timoun yo pral nan lekòl kot Pè a, ni 4 nouvo timoun yo tou ke n’ap resevwa nan fen mwa dawout la.
    • Nou poko fin peye ane lekòl ki sot pase la.
    • Fritzner, bòs ebenis lan, ap vin fin monte pòt yo nan mwa dawout la. 

  • 17 09 2024

    16 09 2024 What’s App Olès

    Nou kòmanse rekòlte pistach depi yè.

    15 09 2024 What’s App Olès

    Jodi-a nou akeyi Francesseca Michel ak Christie Michel nan Òfelina.

    12 09 2024 What’s App Olès

    Jodi-a nou jwenn yon bon lapli. Li bon pou jaden-an. Gen gwo espwa pou yon bon rekòt ane sa.

    28 08 2024 What’s App Olès

    Gwo mèsi papi Frans. De manmi ak mwen pou swè ou nan okazyon 46eme anivèsè maryaj nou.

    12 08 2024 What’s App Olès

    Bos Jean kòmanse ak pòchri-a. Nou itilize menm espas la. Nap agrandi chanm yo epi nou ogmantel yon chanm an plis Nap kraze ansyen blòk. Pou mete nouvo.

  • 31 07 2024

    30 07 2024 What’s App Olès

    Nou Ench lopital la nan randevou ak Wilkervince  Muradier pa  anfòm tou depi lotre jou. Mwen te vini ak li tou. Nou poko fini ak pwosesis la.

    27 07 2024 What’s App Olès

    27 Jiyè 2006 -- 27 Jiyè 2024 -- Sa fè Ofelina genyen 18 lane. Mw swete nou chak bòn fèt. Nou te bay pè-a chante mès nan okazyon-an. Nou te patisipe nan mès la maten-an.

     

    21 07 2024 What’s App Olès

    Mwen poko kòmanse pòchri-a. Koz mwen pat ko resevwa lajan. Semèn mwen te potopwens la te toujou gen difikilte pou ale fè tranzasyon la bank. Mwen te ka jwenn lajan fonksyonman mwa jin. Mwen aprann nan plato Santral ( Ench ) pa gen twòp pwoblèm. Map ale nan randevou ak Wilkervince madi dye vle konsa map eseye.

    21 07 2024 What’s App Olès

    Nou gen 3 nan lòt ti moun yo. Manno te voye yo fè yo fè kèk ekzamen nan sant sante-a. Rezilta yo revele tou lè 3 fè Tifoyid. Yo sou medikaman e regim pandan 15 jou. Se Venel, Okijemps ak Jean Ebel.

    13 07 2024 What’s App Olès

    Sa se jaden nou. Anpil joumou ( Jiromon ). Si se moman nou te la. Nou tap bwè soup ak joumou jaden nou.

    09 07 2024 What’s App Olès

    Wilkervince pat rive ekzeyate yè. Paske gen yon radyografi doktè-a bay fè pou li. Se jodi-a lap fèt. Se pou do li.

    07 07 2024 What’s App Olès

    Li pwobab pou doktè-a remèt nou Kèkè demen dye vle.  Li pa pimal. Map planifye avan lontan pou vini ak tout lòt yo pou yon tès.

    04 07 2024 What’s App Olès

    Wi mw gen nouvèl Wilkervince. Li pa pimal li toujou ap pran swen. Doktè-a te relem yèswa pou enfòm. Gen konplikasyon. yo fè plizyè analiz tou ki montre li fè tibèkiloz yon maladi ki trè kontajyez. Pou sa doktè-a mande fòk mw ta planifye poum vini ak tout lòt ti moun yo. Apre ni granmoun tou pou yon tès. Li di rezilta montre se yon lòt ki transmèt li,yon fason pou wè ki moun.

    26 06 2024 What’s App Olès

    Mwen pale ak moun ki akonpanye Kèkè lopital la. Li kòmanse amelyore piti piti.

    24 06 2024 What’s App Olès

    Kò Wilkervince pa anfòm menm.  Li te komanse amelyore. Rezilta analiz yo te montre li tifoyid. Malgre li nan medikaman. Yè vant rekomanse gwo. Maten-an mw oblije ale ak an ijans Ench.

    23 06 2024 What’s App Yanskian

    Mwen te refè egzamen laboratwa yo, doktè a di mwen byen amelyore. Pou fini trètman an li te banm yon sèl medikaman ankò. Mwen ka di gras BonDye mwen pa pimal.

    Sèlman tchekòp prostat la mwen pa gentan fè.

    17 06 2024 What’s App Olès

    Mw nan lopital Senmichel la ak wilkervince ( kèkè ) li pa anfòm. Li oa respire byen epi vant gwo epi di.

  • 26 06 2024

    26 06 2024 dyalòg nan telefòn avèk Olès epi Yanskian

    • Yanskian enfòme nou ke li nan trètman nan yon lopital Okap. Li te rankontre anpil difikilte pandan plizyè semèn men sanble ke sitiyasyon an vin bon jan amelyore.
    • Yanskian esplike ke li suiv bon konsèy ke li te jwenn, pou li pa pini timoun yo men pito pou li rekonpanse yo.
    • Yanskian vin rete kounye a nan Sent-Àn nan epi l’ap bezwen mèb tou. Li pral fè lis la pou li voye li bay Frans.
    • Nan òfelina a tout moun anfòm, Enelson ak Wilkervens te malad. Men erezman de pitit Olès yo, nou ka di de doktè yo te la, konsa yo te fè dyagnostik epi prekri medikaman ki apwopriye yo.
    • Sitiyasyon an nan peyi a toujou pa janm amelyore. Bandi yo mete sou plas plizyè kolaborasyon, yon fason  pou bòygote ide ki fè konnen pral gen yon fòs militè etranje ki pral vin pote èd nan peyi a. tout moun ap priye pou sitwayen yo pa viktim anba vyolans ki antre nan mouvman sa yo. Bandi yo gen kapasite pou yo itilize pèp la kòm kobay.
    • Konsèy prezidansyèl la ap mete sou pye yon konsèy minis ki pral la pou yo pran bon jan mezi pou yo òganize eleksyon an tout sekirite, nan yon peryòd ki se de zan, se eleksyon pou pòs prezidan.
    • Pòtoprens preske fin izole nèt. Yon sèl wout ki gen pasaj.
    • Travay jaden an ap byen mache. Pwa kongo yo kòmanse leve deja. Erezman nou te kòmanse nan bon moman epi nou pa t’ tann mwayen anplis yo ki te dwe soti depi an Bèljik pou peye tout bagay.
    • Sa fè kèk tan depi Olès pa janm pran chans pou li ale labank, konsa li debouye li pou li prete lajan. William pral ede li pou li retire lajan labank pa twò lontan la.
    • Yon lòt gwo bèf ki pa pou nou te preske fin tiye yonn nan ti bèf nou yo. nou te fin kòche li ( konsa nou tou jwenn vyann nan pou nou manje)
    • Nou espere pou nou kapab kontinye enstale tout kloti yo, yon fason pou tout teren byen bare pou anpeche bèt ak moun antre andadan an.
    • Gras ak jenewozite Pè pawas la, nou raboure 10 ekta tè, se prèske de fwa kantite nou te lwe ofisyèlman an.
    • Yonn nan femèl bèf nou yo gen pou fè pitit.
    • Nou espere pa twò lontan pou ke wout yo kapab fèt. Olès mande eske l’ap posib pou nou ta voye yon nouvo konntenè ak founiti. Bò kote pa l’ li pral eseye konnen eske l’ap posib pou jwenn yon pasaj nan Okap. Frans li menm li pral sonde teren an pou li konnen eske l’ap posib pou li jwenn yon franchiz dwanyè pa yonn oubyen lòt kanal la.
    • Chak dezyèm dimanch nan mwa, Olès òganize yon aprè midi jwèt pou timoun yo nan vwazinaj la. Yo kapab jwe manje bwè.
    • Olès te deja pale nou de 4 nouvo timoun. Kounye a li anonse nou yon 5èm. Nou gen pou nou resevwa plis bon nouvèl sou yo.
    • Nou te gen yon dèt toujou pou antreprenè ki te mouri a, sa genyen kèk mwa depi li te prete nou lajan. Olès mande pou nou ta voye li dirèkteman sou kont eritye yo. Yo te vin mande nou sa tou.
    • Tanzantan, anpil nan zanmi lontan yo vini pou yo gen nouvèl sou Frans. Epi yo tou eksprime anvi yo pou yo kapab rewè Frans ankò pami nou.       

  • 06 06 2024

    05 06 2024 What’s App Olès

    Nou te plante yon pye sitwo nan ti Kare devan Senfwanswa. Li donnen anpil.

    04 06 2024 What’s App Yanskian

    Pou timoun ki poko al lekòl yo, n'ap kontinye travay menm pandan vakans la. Yon fason pou yo byen prepare pou klas mwayèn seksyon an (2ème année Kinder). Yo kòmanse gen lòd nan koloryaj san li pa debòde

    03 06 2024 What’s App Yanskian

    Elèv Kay Mè yo kòmanse konpoze depi vandredi. Semèn sa se travay San kanpe, pou reyisi dènye trimès la. Pou lòt lekòl yo se nan twazyèm semèn egzamen yo ap kòmanse.

    21 05 2024 What’s App Olès

    Nou tap prepare pou kòmanse travay maten-an dezyèm jou travay nou toujou nan plante pwa kongo.

    19 05 2024 What’s App Olès

    Se jodi-a 3 ti moun yo. Islande, Manoucheca ak Mirlanda fè premyè kominyon.

    17 05 2024 What’s App Olès

    Operatè yo kòmanse ak dezyèm pase-a jodi-a. Nou te genpil lapli nan 2 semèn pase yo ki fè yo pat ka fè dezyèm lan. Kounya lapli-a kanpe depi 8 jou. Sa fè jodi-a yo kòmanse yo sipoze fini samdi dye vle. Nou kòmanse mobilize ouvriye yo poun kòmnse plante pwa kongo lendi dye vle. Map prete sou kont rezèv nou gen nan kont nou poun avanse. Konsa lè kòb Wilde Ganzen rive lap ranplase depans ki fèt yo.

    16 05 2024 What’s App Olès

    Bilten Mirlanda ak rezilta premye ak dezyèm trimès. Mè-a te rele paran kèk nan elèv ki byen travay nan klas yo. Mirlanda fè pati. Sete pou enfòme paran yo de yon enfòmasyon espesyal yon ONG ap fè pou ti moun ki chwazi yo. Se jedi ak vandredi pwochen.

  • 25 04 2024

    25 04 2024 dyalòg nan telefòn avèk Olès

    • Depi nan kòmansman mwa d’avril. Yon epidemi tonbe nan òfelina a, avèk sentom sa yo : fyèv, maltèt, grip, vomisman. Men nan moman an nou debouye nou, konsa tout moun kapab retounen ale lekòl yo. Doktè Manno (Emmanuel yonn nan pitit Olès yo) te la nan òfelina a depi de mwa, akoz de yon sikonstans, li te tou pwofite ede malad yo.
    • Tout granmoun yo anfòm, men gen nan yo ki gen ti doulè akoz yo kòmanse gen laj.
    • Sitiyasyon an nan peyi Ayiti toujou poko janm chanje. Vin gen mwens kidnapin men bandi yo asosye nan ‘’ viv ansanm’’  k’ap dirije ak gran chèf Jimmy Chérizier alyas Babekyou.
    • Konsèy prezidansyèl yo te anonse a enstale sou pwoteksyon sòlda ameriken yo. Se nouvo konsèy sa k’ap deside si yon fòs entènasyonal ka antre nan peyi a.
    • Nou pa genyen ni kochon ni kabrit nan moman an la. Bèf yo ap byen pase depi gen lapli. Yo vin jwenn plis zèb pou yo manje. Lapli gen yon semèn depi l’ap tonbe. Nou kòmanse preparatif pou sezon semans lan. Nou gentan mete travayè yo an gad. Olès ap voye foto lè y‘ap raboure tè a.
    •  Yonn nan femel bèf yo fè pitit. Se yon gwo sipriz paske nou pa te konnen li te plenn,
    • Nou gen 7 chen ki se bon gadyen. Yo tout se pou William. Yo tout jape depi yon moun antre nan lakou a.
    • Pou Jean-Ebel, Sondy ak Wilkervince, nou jwenn yon lekòl pou yo, yo prale nan mwa Septanm.
    • Petèt ke nou gen pou nou resevwa ankò 4 timoun. Nan yo ap genyen de frè epi de lòt yo ap soti Gonayiv. Yo gen pou yo vini nan mwa daout la, epi yo kapab jwenn yon chans pou yo ale lekòl nan mwa Septanm nan.
    • Olès ta renmen enstale yon kloti, pou izole bèt yo ki ka rann aksè ak espas nou an enposib.
    • Nou ta renmen enstale yo pak kochon anplis pou nou mete kochon yo.
    • Gen kèk nan matla yo ki fini, ki merite pou yo ranplase.
    • Fòk pòt yo nan Franswa nan pati kay anba yo repare.
    • Fritzner gen pou li vini pou li mete kle nan pòt yo nan Sent-Àn.

  • 25 04 2024

    10 04 2024 What’s App Olès

    Islande, Manoucheca ak Mirlanda. Yap kominye nan dat 19 me kap vini la. Mwen konnen deja kèk frè nap gen pou fè pou yo chak. Mè yo kap responsab pou fè rad yo nan menm modèl. Se yo kap peye frè kap genyen pou sa.

    09 04 2024 What’s App Yanskian

    Nou pral kontinye travay pandan tout mwa sa yo ak vakans la, Yon fason pou nou mete tout timoun yo prè pou yo ale nan 2èm ane Kinder. Tout enskripsyon yo fèt pou yo ale nan lekòl Pè a. Men Jean Ebel ap bezwen ti preparasyon toujou pou Li vo klas la. Se menm bagay la tou pou Kervins. Gwo felisitasyon pou Berlandine ki deja reyisi tès evalyasyon an pou Li ale nan klas 2èm ane Kinder a. Li te ekri epi reponn tout kesyon evalyasyon yo. Yo toujou evalye tout timoun nan moman y'ap fè enskripsyon nan lekòl Pè a. Timidité fè Sondy pa reyisi tès pa Li a. Menm pale Li pa te vle pale. Se poutèt sa  Li an atant menm Jan ak Jean Ebel ni Kervins. Men travay nan Osjosma yo pral plis konsantre sou twa mesye sa yo, Yon fason pou yo ale nan 2èm ane Kinder menm jan tankou Berlandine. Pa nan 1e ane Kinder paske laj yo deja depase.

    31 03 2024 What’s App Olès

    Nou gen fèt nan òfelina jodi-a. William ki òganize poufè fèt la ak tout  pòv yo nan okazyon fèt pak la. Lap ba yo manje bwason ak yon ti anvlòp.

    13 03 2024 What’s App Olès

    Pwa kongo sèch. Nou prepare yon kantite pou nou konsome. Nou itilizel 4 fwa pa senmenn. Lòt jou yo se gwo pwa.

Pages

Powered by Drupal